پہرا (نمائندہ خصوصی):
جامعہ اسلامیہ دارالفلاح للبنات، پہرا میں سالانہ تعلیمی مظاہرہ اور اختتامی انعامی اجلاس نہایت خوش اسلوبی، نظم و ضبط اور دینی ماحول میں منعقد ہوا۔ اس موقع پر طالبات، اساتذہ، والدین، سرپرستوں اور معزز مہمانوں کی بڑی تعداد شریک رہی۔
پروگرام کا آغاز تلاوتِ قرآنِ کریم سے ہوا، جس کے بعد نعتِ رسولِ مقبول ﷺ پیش کی گئی۔ طالبات نے دینی و عصری علوم سے متعلق مختلف پروگراموں کے ذریعے اپنی تعلیمی صلاحیتوں کا شاندار مظاہرہ کیا۔ عربی، اردو اور انگریزی تقاریر، مکالمے، تعلیمی خاکے، دینی سوال و جواب اور اخلاقی و اصلاحی موضوعات پر پیشکشوں نے حاضرین کو متاثر کیا۔

ادارے کی طالبات نے اپنے مظاہروں کے ذریعے یہ واضح کیا کہ دارالفلاح للبنات، پہرا میں قرآن، حدیث، فقہ اور تفسیر کے ساتھ ساتھ عصری مضامین اور عملی مہارتوں پر بھی خصوصی توجہ دی جاتی ہے، تاکہ طالبات علمی، فکری اور اخلاقی اعتبار سے ایک مضبوط اور باکردار نسل کی صورت میں تیار ہوں۔
اختتامی انعامی اجلاس کے موقع پر سال بھر میں نمایاں کارکردگی دکھانے والی طالبات کو انعامات اور اسناد سے نوازا گیا۔ ذمہ دارانِ ادارہ اور مہمانانِ خصوصی نے طالبات کی حوصلہ افزائی کرتے ہوئے ادارے کی تعلیمی و تربیتی خدمات کو سراہا اور اسے ملت کے لیے ایک اہم اثاثہ قرار دیا۔

آخر میں دعا کے ساتھ پروگرام کا اختتام ہوا۔ حاضرین نے اس کامیاب اور بامقصد تعلیمی مظاہرے پر اطمینان کا اظہار کرتے ہوئے ادارے کے ذمہ داران اور معلمات کی محنت کو قابلِ ستائش قرار دیا۔