امتحان انسانی زندگی کا ایک اہم مرحلہ ہے جو انسان کی محنت، صبر اور صلاحیتوں کو پرکھتا ہے۔ زندگی خود بھی ایک مسلسل امتحان ہے، مگر تعلیمی امتحان اس کا وہ پہلو ہے جس سے تقریباً ہر طالب علم کو گزرنا پڑتا ہے۔ امتحان صرف کتابی علم جانچنے کا ذریعہ نہیں بلکہ یہ انسان کے حوصلے، نظم و ضبط اور وقت کی پابندی کا بھی امتحان ہوتا ہے۔

امتحان کا نام سنتے ہی اکثر طلبہ کے دل میں خوف اور بے چینی پیدا ہو جاتی ہے۔ راتوں کی نیند اڑ جاتی ہے اور دل میں طرح طرح کے خدشات جنم لینے لگتے ہیں۔ لیکن اگر غور کیا جائے تو یہی امتحان انسان کو محنت کی عادت سکھاتا ہے اور مستقبل کے بڑے امتحانات کے لیے تیار کرتا ہے۔ جو طالب علم پورا سال دل لگا کر محنت کرتا ہے، اس کے لیے امتحان خوف نہیں بلکہ اپنی صلاحیت دکھانے کا موقع بن جاتا ہے۔

امتحان ہمیں نظم و ضبط سکھاتا ہے۔ طالب علم وقت کی قدر کرنا سیکھتا ہے، منصوبہ بندی کرتا ہے اور اپنی کمزوریوں کو پہچانتا ہے۔ ناکامی کی صورت میں امتحان صبر اور حوصلہ عطا کرتا ہے، جبکہ کامیابی انسان میں اعتماد اور خود اعتمادی پیدا کرتی ہے۔ یہی وجہ ہے کہ کہا جاتا ہے کہ ناکامی بھی کامیابی کی پہلی سیڑھی ہوتی ہے۔

تاہم یہ بھی حقیقت ہے کہ امتحان کا نظام بعض اوقات طلبہ پر غیر ضروری ذہنی دباؤ ڈال دیتا ہے۔ نمبروں کی دوڑ میں تخلیقی صلاحیتیں دب جاتی ہیں۔ اس لیے ضروری ہے کہ امتحان کو صرف نمبروں کا کھیل نہ بنایا جائے بلکہ اسے سیکھنے اور سمجھنے کا ذریعہ بنایا جائے۔صوبۂ جھارکھنڈ کی عظیم و قدیم دینی درسگاہ جامعہ قادریہ، اسلامی مرکز ہندپیڑھی رانچی میں سالانہ امتحان کا باقاعدہ آغاز آج بتاریخ 13 جنوری 2026ء سے ہو چکا ہے۔
یہ امتحان تحریری صورت میں شروع ہوا ہے جو 29 جنوری 2026ء تک مختلف مراحل اور وقفوں کے ساتھ جاری رہے گا۔ امتحانی نظام میں تحریری کے ساتھ ساتھ تقریری (Viva) امتحان بھی شامل ہے۔
جامعہ کی دیرینہ اور قابلِ فخر روایت کو برقرار رکھتے ہوئے، تقریری امتحان کے لیے بیرونی ممتحنین کی تشریف آوری کو یقینی بنایا گیا ہے۔

اس سالانہ امتحان میں اعدادیہ تا سادسہ اور حفظ و قراءت مع پرائمری کے تمام درجات کے طلبہ شرکت کر رہے ہیں۔
اللہ تعالیٰ سے دعا ہے کہ وہ تمام طلبہ کو کامیابی، علمِ نافع اور روشن مستقبل سے سرفراز فرمائے۔
رپورٹ:محمد شمشاد عالم مصباحی استاذ وناظم نشرواشاعت اسلامی مرکز
ومعین القاضی ادارہ شرعیہ جھارکھنڈ رانچی