رانچی:
مدرسہ حسینیہ حسین آباد کڈرو، رانچی میں عصری اور معیاری تعلیم کی فراہمی کے مقصد سے جمعیت اسٹڈی سینٹر کے زیرِ اہتمام اسمارٹ کلاس سسٹم کا باضابطہ آغاز کیا گیا ہے، جو گزشتہ تین ماہ سے کامیابی کے ساتھ مسلسل جاری ہے۔ اس نظام کے ذریعے طلبہ روزانہ ایک گھنٹے کی لائیو اسمارٹ کلاس میں شریک ہوتے ہیں، جہاں انہیں مختلف اہم مضامین جدید انداز میں پڑھائے جا رہے ہیں۔

اسمارٹ کلاس روم کو جدید تقاضوں کے مطابق ڈیجیٹل اسکرین، آن لائن لنکڈ تدریسی وسائل اور معیاری آڈیو ویزول سسٹم سے آراستہ کیا گیا ہے، تاکہ طلبہ دینی ماحول میں رہتے ہوئے عصری اور سرکاری طور پر تسلیم شدہ تعلیم سے بھرپور فائدہ اٹھا سکیں۔

جمعیت اسٹڈی سینٹر اور NIOS اوپن اسکولنگ کی خصوصیات:
مدارس کے طلبہ کے لیے عصری تعلیم کی کمی کو پورا کرنے کا مؤثر ذریعہ:
(این آئی او ایس) ایک سرکاری تسلیم شدہ، لچکدار تعلیمی بورڈ ہے جو مدارس کے لیے سب سے موزوں ماڈل مانا جاتا ہے۔

کم فیس، آسان مضامین، سہل امتحانی نظام اور مضمون کے انتخاب کی آزادی—یہ سب اس نظام کی بنیادی خوبیاں ہیں۔

این آئی او ایس کی اسناد مستقبل کے کالج داخلوں، مسابقتی امتحانات اور روزگار میں معاون ثابت ہوتی ہیں۔

دسویں جماعت کا سرٹیفیکیٹ نہ صرف تعلیمی حیثیت رکھتا ہے بلکہ شناخت کے ایک معتبر ثبوت کے طور پر بھی استعمال ہوتا ہے۔

لائیو کلاسز کا نظم:
جمعیت علمائے ہند کے مرکزی دفتر سے روزانہ نشر ہونے والی اسمارٹ کلاسز میں دسویں اور بارہویں جماعت کے لیے Psychology، Urdu، Business Studies، Social Science، English اور دیگر مضامین پڑھائے جا رہے ہیں۔
گزشتہ تین ماہ کے دوران طلبہ نے مکمل توجہ، نظم و ضبط اور تسلسل کے ساتھ ان کلاسوں میں شرکت کی ہے۔

مدرسہ کی خصوصی کاوش:
مدرسہ کی جانب سے اس سال تقریباً 10 طلبہ کا NIOS میں داخلہ کرایا گیا ہے، اور آئندہ بھی ضرورت مند طلبہ کے داخلے کی یہ سہولت جاری رہے گی۔
یہ سلسلہ اس کوشش کا حصہ ہے کہ ایسے طلبہ جو وسائل کی کمی کے باعث عصری تعلیم سے محروم رہ جاتے ہیں، ان کے لیے بہتر تعلیمی راستے ہموار کیے جائیں۔

گزشتہ تین ماہ سے اسمارٹ کلاس میں طلبہ کی مسلسل شرکت، بڑھتی ہوئی سمجھ اور جدید تعلیمی ماحول سے حاصل ہونے والے نتائج اس بات کی علامت ہیں کہ آنے والے برسوں میں اس نظام کے ثمرات مزید واضح اور مؤثر انداز میں سامنے آئیں گے۔انشاءاللہ
منجانب: دفتر تعلیمات مدرسہ ہذا