کولکاتا (نامہ نگار) مغربی بنگال اردو اکیڈمی میں گزشتہ ہفتے اردو ادب اور ہندی فلموں کے گہرے ادبی و ثقافتی تعلق کو موضوع بنا کر تین روزہ جشن کا انعقاد کیا گیا، جس میں سیمینار، ادبی نشستیں، مختلف مقابلے اور داستان گوئی کی خصوصی محفلیں شامل تھیں۔ اس تین روزہ ادبی تہوار میں ریاست کے مختلف حصوں سے اساتذہ، ادباء، محققین اور طلبہ نے بڑی تعداد میں شرکت کی اور اسے اردو زبان کے فروغ کی ایک اہم اور کامیاب کوشش قرار دیا۔

پروگرام کے پہلے دو دن میں اردو زبان کی تاریخی ارتقا، فلمی دنیا پر اس کے اثرات، اور ہندی سینما میں اردو شعری و نثری روایت کی موجودگی پر تفصیلی گفتگو ہوئی۔ مختلف مقررین نے یہ مؤقف پیش کیا کہ ہندی فلموں کی مقبولیت اور ان کے مکالموں و گیتوں کی تاثیر میں سب سے بڑا حصہ اردو زبان کی لطافت، روانی اور تہذیبی گہرائی کا ہے۔ اسی سلسلے میں منعقدہ مقابلوں میں نوجوان طلبہ نے اپنی تخلیقات اور تحقیقی نکات پیش کر کے حاضرین سے خوب داد حاصل کی۔

جشن کے اختتامی روز خصوصی داستان گوئی کا اہتمام کیا گیا جو اس پروگرام کی اختتامیہ کڑی ثابت ہوئی۔ آخری روز کی اس محفل میں معروف داستان گو زاہد حسین اور بلال صابر نے اپنی دلکش اور محققانہ اندازِ بیان سے حاضرین کو مسحور کر دیا۔ ان دونوں کے ساتھ SSC صابر اسٹڈی سینٹر کی پوری ٹیم بھی موجود رہی، جس نے اس ادبی سرگرمی میں بھرپور شرکت کی اور اسے کامیاب بنانے میں اہم کردار ادا کیا۔

اساتذہ میں بلال صابر، زاہد حسین، اور زرلش غزل نمایاں طور پر شریک رہے۔ ان کے علاوہ صوفیہ معین، شیخ رفعت، شمیمہ شمیم، آفرین پروین، تبسم کلام سمیت دیگر طلبہ و طالبات نے بھی اپنی موجودگی درج کروائی اور محظوظ ہوئے ۔ شرکا نے اردو اکیڈمی کی اس کاوش کو سراہتے ہوئے کہا کہ اس طرح کے پروگرام زبان و ادب کے فروغ اور نئی نسل کو اپنی تہذیبی جڑوں سے جوڑنے میں اہم کردار ادا کرتے ہیں۔

تمام مہمانوں اور شرکا نے مغربی بنگال اردو اکیڈمی کے اس تین روزہ جشن کو نہایت مفید، معلوماتی اور یادگار قرار دیا۔ محفل کے دوران کئی طلبہ نے کہا کہ ایسے پروگرام انہیں تخلیقی سرگرمیوں میں حصہ لینے کا موقع فراہم کرتے ہیں اور زبان کے اظہار کے نئے پہلو سکھاتے ہیں۔ اس موقع پر اکیڈمی کے ذمہ داران نے عہد کیا کہ مستقبل میں اس نوعیت کے مزید پروگراموں کا انعقاد کیا جائے گا تاکہ اردو زبان کی ادبی روایت اور فلمی دنیا میں اس کی خدمات کو نئی نسل کے سامنے واضح کیا جا سکے۔

تین روزہ جشن کے اختتام پر حاضرین نے منتظمین کا شکریہ ادا کیا اور امید ظاہر کی کہ آنے والے برسوں میں بھی اس سطح کے پروگرام جاری رہیں گے، تاکہ ادب اور سینما کے تعلق پر ہونے والی علمی و تحقیقی گفتگو کا سلسلہ برقرار رہے۔